एल्‍गार न्‍यूज (परवेज पठाण) :-
येत्‍या काही दिवसात जिल्‍हा परिषद व पंचायत समितीची निवडणूक होणार आहे. सध्‍या नगरपालिकांच्‍या निवडणुका सुरू असून सुप्रीम कोर्टाने स्‍थगिती न दिल्‍यास पुढील महिन्‍यात जिल्‍हा परिषद व पंचायत समितीच्‍या निवडणुका होणार असल्‍याचे दिसत आहे. त्‍यादृष्‍टीने सर्वत्र इच्‍छुक उमेदवार समोर येतांना दिसत आहेत.
घनसावंगी तालुक्‍यात ऐनवेळी काही घडामोडी घडतात का हे पाहणे महत्‍वाचे ठरणार आहे, मात्र तुर्तास तरी जिल्‍हा परिषद व पंचायत समितीच्‍या निवडणुकीत युती किंवा आघाडीच्‍या दृष्‍टीने अद्याप स्‍पष्‍ट संकेत मिळालेले नाहीत. त्‍यामुळे सर्वच पक्ष स्‍वतंत्रपणे तयारी करत असल्‍याचे दिसत आहे.
कुंभार पिंपळगांव पंचायत समिती गण हा ओबीसी महिला प्रवर्गासाठी राखीव असून सदरील पंचायत समिती गणातून निवडणूक लढण्‍यास अनेक जण इच्‍छुक असल्‍याचे दिसत आहे. एल्‍गार न्‍यूजला प्राप्‍त माहितीनुसार इच्‍छुक उमेदवारांची माहिती खालील प्रमाणे आहे.
रफीक कुरेशी
एकनाथ शिंदे यांच्‍या शिवसेनेचे कार्यकर्ते असलेले रफिक कुरेशी हे त्‍यांच्‍या पत्‍नी शमीमबी रफीक कुरेशी यांना कुंभार पिंपळगांव पंचायत समिती गणातून निवडणूक लढवण्‍यास इच्‍छुक आहेत. रफीक कुरेशी हे गेल्‍या १० वर्षांपासून कुंभार पिंपळगांव ग्रामपंचायत सदस्‍य आहेत. सामाजिक कार्यात त्‍यांचा नेहमी सहभाग असून सर्व जाती धर्माच्‍या नागरिकांशीही त्‍यांचा चांगला जनसंपर्क आहे. ग्रामपंचायतच्‍या माध्‍यमातूनही ते विकासकामे करण्‍यासाठी प्रयत्‍नशील असतात. आमदार डॉ.हिकमत उढाण यांचे ते समर्थक असून पक्षाच्‍या वरिष्‍ठ नेत्‍यांशीही त्‍यांचे चांगले संबंध आहेत. रफीक कुरेशी यांचा कुंभार पिंपळगांव पंचायत समिती गणासह तालुक्‍यातही चांगला जनसंपर्क आहे. पक्षाने संधी दिल्‍यास दिल्‍यास रफीक कुरेशी हे त्‍यांच्‍या पत्‍नी शमीमबी रफीक कुरेशी यांना कुंभार पिंपळगांव पंचायत समिती गणातून निवडणूक लढवू शकतात असे दिसत आहे.
संजय सोळंके
भारतीय जनता पार्टीचे कार्यकर्ते असलेले संजय सोळंके हे त्‍यांच्‍या पत्‍नी सौ.मिना संजय सोळंके यांना कुंभार पिंपळगांव पंचायत समिती गणातून निवडणूक लढवण्‍यास इच्‍छुक आहेत. संजय सोळंके यांचा सुध्‍दा सामाजिक कार्यात सहभाग असतो, पक्षाच्‍या माध्‍यमातून सर्व समाज बांधवांच्‍या अडीअडचणी सोडवण्‍यासाठी ते प्रयत्‍नशील असतात असे त्‍यांनी सांगितले. यंदा त्‍यांना पक्षाकडून तिकीट मिळावे यासाठी ते प्रयत्‍नशील आहेत. त्‍यादृष्‍टीने त्‍यांनी भेटीगाठी सुरू केल्‍याचे दिसत आहे. पक्षाने संधी द्यावी या दृष्‍टीने अनेक नेत्‍यांच्‍या संपर्कात असल्‍याचे त्‍यांनी सांगितले. मागील काळात केलेले सामाजिक कार्य लक्षात घेता पक्षाने संधी द्यावी अशी त्‍यांची भावना आहे. भारतीय जनता पार्टीकडून संधी मिळाल्‍यास संजय सोळंके हे त्‍यांच्‍या पत्‍नी सौ.मिना संजय सोळंके यांना कुंभार पिंपळगांव पंचायत समिती गणातून निवडणूक लढवू शकतात असे दिसत आहे.
समीर पठाण
राष्‍ट्रवादी कॉंग्रेस (शरद पवार) पक्षाचे कार्यकर्ते असलेले समीर अजीमखॉं पठाण हे त्‍यांच्‍या पत्‍नी आयशा समीर पठाण यांना कुंभार पिंपळगांव पंचायत समिती गणातून निवडणूक लढवण्‍यास इच्‍छुक आहेत. समीर पठाण यांचे वडील अजीमखॉं पठाण हे कृषि उत्‍पन्‍न बाजार समितीचे संचालक आहेत. समीर पठाण यांनी मागील काळात मित्रमंडळींच्‍या सहकार्याने जवळपास १५० जणांचे रक्‍तदान शिबीर घेतले असून सामाजिक कार्यातही त्‍यांचा सहभाग असतो. सर्व जाती धर्माच्‍या नागरिकांशी त्‍यांचे चांगले संबंध असून पंचायत समिती गणासह तालुक्‍यातही त्‍यांचा चांगला जनसंपर्क आहे. युवकांच्‍या अडीअडचणी दूर करण्‍यासाठी ते प्रयत्‍नशील असतात त्‍यामुळे युवकांमधून त्‍यांच्‍या उमेदवारीसाठी विशेष आग्रह असल्‍याचे दिसत आहे. समीर पठाण हे माजी मंत्री राजेश टोपे यांचे समर्थक असून पक्षाने संधी दिल्‍यास समीर पठाण हे त्‍यांच्‍या पत्‍नी आयशा समीर पठाण यांना कुंभार पिंपळगांव पंचायत समिती गणातून निवडणूक लढवू शकतात असे दिसत आहे.
कोणाला मिळणार संधी ?
युती किंवा आघाडी बाबत अद्याप स्‍पष्‍ट असे संकेत मिळालेले नसल्‍याने प्रत्‍येक पक्ष स्‍वतंत्रपणे निवडणूक लढण्‍याची तयारी करत आहे. युती किंवा आघाडी न झाल्‍यास उमेदवारांची संख्‍या जास्‍त राहणार हे स्‍पष्‍ट आहे. तुर्तास काही इच्‍छुकांची नावे समोर आली असली तरी भविष्‍यात अजून इच्‍छुकांची संख्‍या वाढू शकते. जिल्‍हा परिषद व पंचायत समितीच्‍या निवडणुकीची तारीख जाहीर झाल्‍यावर प्रचाराला वेळ कमी भेटतो त्‍यामुळे अनेकजण आत्‍तापासूनच गाठीभेटी घेवून तयारी करत असल्‍याचे दिसत आहे. अर्थातच कोणता पक्ष कोणाला संधी देणार याबाबत येत्‍या काही दिवसात चित्र अधिक स्‍पष्‍ट होईल अशीच सध्‍याची परिस्थिती आहे. तोपर्यंत Wait & Watch….