एल्‍गार न्‍यूज (परवेज पठाण) :-
घनसावंगी तालुक्‍यातील कुंभार पिंपळगांवात लाखो रूपयांचा गुटखा येतो कुठून ? शासनाने बंदी घालून एक दशक उलटूनही राजरोसपणे कोट्यावधी रूपयांचा गुटखा विक्री होत असेल तर याला आशीर्वाद कोणाचा ? असा सवाल उपस्थित होवू लागला आहे.
याबाबत सविस्‍तर वृत्‍त असे की, घनसावंगी तालुक्‍यातील कुंभार पिंपळगांव येथे दररोज लाखो रूपयांचा तर महिनाभरात कोट्यावधी रूपयांचा गुटखा विक्री होत असून किराणा दुकानांपासून ते पान टपरी व गल्‍ली बोळातील दुकानांवर सुध्‍दा गुटखा सहज मिळत आहे. एवढंच नव्‍हे तर दररोज लाखो रूपयांचा गुटखा कुंभार पिंपळगांव सह परिसरातील अनेक गावांमध्‍ये पार्सल केला जात आहे.
माल येतो कुठून ?
कुंभार पिंपळगांवात येणारा माल हा बाहेर राज्‍यातील नेटवर्क (साखळी) च्‍या माध्‍यमातून येत असल्याचे बोलले जात आहे. शासनाने राज्‍याच्‍या सीमांवर पथक नेमलेले असतांना सुध्‍दा कोट्यावधी रूपयांचा गुटखा राज्‍यात आणि जिल्‍ह्यात येत आहे हे वास्‍तव आहे. कुंभार पिंपळगावात माल कसा येतो ? कोणाकडे येतो ? मालाची साठवणूक कोठे होते ? माल पार्सल कोण करतो ? याची सर्व माहिती स्‍थानिक पोलीस प्रशासनाला नक्‍कीच आहे. कुंभार पिंपळगांव व परिसरात कोट्यावधी रूपयांचा माल विक्री व पार्सल केला जात असतांना अन्‍न व औषध प्रशासन आणि पोलीस प्रशासन बघ्‍याची भूमिका घेत असल्याचे दिसत आहे. त्‍यामुळेच की काय हप्‍त्‍याचे किंवा अर्थपूर्ण व्‍यवहाराचे जबरदस्‍त मॅनेजमेंट झाले असावे अशी प्रतिक्रिया नागरिक देत आहेत.
गुटखा विक्रीवर बंदी !
महाराष्ट्रात गुटखा आणि तंबाखूयुक्त पानमसाल्याच्या विक्री, उत्पादन, वाहतूक आणि साठ्यावर सरकारने १९ जुलै २०१२ पासून कडक बंदी लागू केली आहे. मात्र, या निर्णयाला आता एक दशकाहून अधिक काळ उलटल्यानंतरही राज्यभरात गुटखा विक्रीचा धंदा बिनधास्त सुरू असल्याचे स्‍पष्‍टपणे दिसून येत आहे. अन्‍न व औषधी प्रशासन आणि पोलीस प्रशासनाचा धाक राहीला नसल्‍याने गुटखा माफिया वारंवार डोके वर काढताना दिसत आहेत. गुटख्यामुळे निर्माण होणारा तोंडाचा कर्करोग, घशाचे आजार आणि मृत्यूचे प्रमाण वाढत असताना आरोग्य विभागाचे प्रयत्न अपुरे ठरत आहेत.
घनसावंगी तालुक्‍यात रान मोकळं !
जालना जिल्‍ह्यात मागील काळात काही ठिकाणी धाड टाकून लाखो रूपयांचा गुटखा जप्‍त करण्‍यात आला खरा, परंतू अशी कारवाई एखाद्यावेळीच नावापुरतीच पहायला मिळते. त्‍यानंतर पुन्‍हा रान मोकळं सोडून देण्‍यात येतं. विशेष करून घनसावंगी तालुक्‍यात अन्‍न व औषध प्रशासन आणि पोलीस प्रशासन गुटखा माफीयांवर अधिकच मेहरबान असल्याचे दिसत असून त्‍यामुळेच तालुक्‍यात कुठलीही कारवाई होतांना दिसत नाही.
विशेष आशीर्वाद कोणाचा ?
कुंभार पिंपळगांवात राजरोसपणे किंवा बिनधास्‍तपणे कोट्यावधी रूपयांचा गुटखा येत असेल आणि कुठलीही कारवाई होत नसेल तर वेगळं काही सांगायची आवश्‍यकता नाही. घनसावंगी पोलीस ठाणे आणि कुंभार पिंपळगांव पोलीस चौकीला लाखो किंबहुना कोट्यावधी रूपयांचा गुटखा येतो कुठून आणि कोणाकडे येतो ? याची सर्व कल्‍पना असतांनाही कुठलीही कारवाई होत नाही. त्‍यामुळे FDA आणि स्‍थानिक पोलीस प्रशासनाच्‍या भूमिकेवर प्रश्‍नचिन्‍ह निर्माण झाले आहेत.
FDA व SP लक्ष घालणार का ?
कुंभार पिंपळगांव आणि परिसरातील असंख्‍य गावांमध्‍ये कोट्यावधी रूपयांचा गुटखा विक्री व पार्सल केला जात असल्‍याने अन्‍न व औषध प्रशासन तसेच पोलीस अधिक्षक, अतिरिक्‍त पोलीस अधिक्षक, उपविभागीय पोलीस अधिकारी, LCB याकडे लक्ष देणार का ? असा प्रश्‍न सर्वसामान्‍य जनता विचारत आहे.