एल्‍गार न्‍यूज (परवेज पठाण) :-
घनसावंगी तालुक्‍यातील कुंभार पिंपळगांव येथे शासनाची कुठल्‍याही प्रकारची परवानगी न घेता जवळपास १०० कोटींची बेकायदेशीर प्‍लॉटिंग काढण्‍यात आल्‍याची तक्रार करण्‍यात आल्‍याने खळबळ उडाली असून तक्रारदाराने प्रशासनाकडे या प्रकरणाची तात्‍काळ चौकशी करून कारवाईची मागणी केली आहे.
याबाबत सविस्‍तर वृत्‍त असे की, घनसावंगी तालुक्‍यातील कुंभार पिंपळगांव येथील अनधिकृत किंवा बेकायदेशीर प्‍लॉटिंग संदर्भात जिल्‍हा व तालुका प्रशासनाला लेखी स्‍वरूपात निवेदन सादर करण्‍यात आले असून त्‍यानुसार कुंभार पिंपळगांव व परिसरात एन.ए. (अकृषिक परवाना) किंवा शासनाची कुठल्‍याही प्रकारची परवानगी न घेता किमान ३० ते ४० ठिकाणी कोट्यावधी रूपयांची अनधिकृत प्‍लॉटिंग काढून प्‍लॉट विक्री करण्‍यात येत आहे. आश्‍चर्य म्‍हणजे सदरील अनधिकृत प्‍लॉटिंगचा आकडा हा जवळपास १०० कोटीच्‍या आसपास जात असल्‍याचे सांगितले जात आहे.
तक्रारीनुसार कुंभार पिंपळगावातून अंबड ते आष्‍टी व रांजणी ते राजाटाकळी असे दोन महामार्ग गावातून गेलेले आहेत. या महामार्गाच्‍या दोन्‍ही बाजूला प्‍लॉटिंग काढून प्‍लॉट विक्री केले जात आहे. विशेष करून अंबड ते आष्‍टी या महामार्गावर पाडूळी खु. या गावापासून ते कुंभार पिंपळगावापर्यंत दोन्‍ही बाजूला प्‍लॉटिंग काढण्‍यात आलेली आहे. तसेच कुंभार पिंपळगांव येथे तक्रारदार राहत असलेल्‍या भागात म्‍हणजेच नुतन वसाहतीच्‍या मागील भागात प्‍लॉटिंग काढण्‍यात आली आहे. यासह भेंडाळा रोड, राजाटाकळी रोड, अरगडे गव्‍हाण रोड, आष्‍टी रोड, मुर्ती फाटा, झोपडपट्टीचा मागील भाग, जुन्‍या पोलीस चौकी समोरून जाणारा पाणंद रस्‍ता अशा अनेक ठिकाणी शेतीसाठी असलेली जमीन ही विकत घेवून त्‍यावर अनधिकृत प्‍लॉटिंग काढून प्‍लॉट विक्री करण्‍यात येत आहेत.
विशेष म्‍हणजे एन.ए. किंवा शासनाची कुठल्‍याही प्रकारची परवानगी न घेता एवढ्या मोठ्या प्रमाणावर प्‍लॉटिंग काढून मनमर्जीप्रमाणे प्‍लॉट विक्री सुरू आहे. सदरील भू-माफीया हे संगणमत करून रजिस्‍ट्री ऑफीसला रजिस्‍ट्री करून देत असून ग्रामसेवकाला हाताशी धरून ग्रामपंचायत मध्‍ये नोंद केली जात आहे. यामुळे शासनाचा कोट्यावधी रूपयांचा महसूल बुडत असल्‍याचेही तक्रारीत म्‍हटले आहे.
सदरील सर्व ठिकाणी असलेल्‍या प्‍लॉटिंगचा आकडा हा १०० कोटीच्‍या आसपास जाईल अशी परिस्थिती आहे. सदरील अनधिकृत प्‍लॉटिंग करणारे सातत्‍याने नवनवीन ठिकाणी प्‍लॉटिंग काढत असून यांच्‍यावर वेळीच कायदेशीर कारवाई न झाल्‍यास याची व्‍याप्‍ती अजून खूप वाढू शकते. या अनधिकृत प्‍लॉटिंगच्‍या गोरखधंद्यात काही कर्मचाऱ्यांचा आशीर्वाद असल्‍याचेही नमूद करण्‍यात आले आहे.
त्‍यामुळे वरिष्‍ठ पातळीवरून या प्रकरणाची स्‍थळपाहणी करून अनधिकृत प्‍लॉटिंगच्‍या माध्‍यमातून सुरू असलेली प्‍लॉट विक्री तात्‍काळ थांबवावी व संबंधितांवर कारवाई करावी, नसता नाईलाजास्‍तव जिल्‍हाधिकारी कार्यालयासमोर उपोषण करण्‍यात येईल असा इशारा ज्‍येष्‍ठ सामाजिक कार्यकर्ते विष्‍णू कडाजी शिंदे यांनी निवेदनाद्वारे दिला आहे. विष्‍णू शिंदे यांनी संबंधित अधिकाऱ्यांना निवेदन देवून विषयाचे गांभीर्य लक्षात आणून दिले असता वरिष्‍ठांनी चौकशी करून तथ्‍य आढळल्‍यास संबंधितांना नोटीसा काढणार असल्‍याचे विष्‍णू शिंदे यांनी सांगितले.
निवेदनाची प्रत जिल्‍हाधिकारी यांच्‍यासह मुख्‍य कार्यकारी अधिकारी जिल्‍हा परिषद जालना, जिल्‍हा मुद्रांक निबंधक जालना, उपविभागीय अधिकारी अंबड, तहसीलदार घनसावंगी, गटविकास विकास अधिकारी पंचायत समिती घनसावंगी, पोलीस ठाणे व पत्रकार बांधवांना देण्‍यात आली आहे.
प्रशासन कारवाई करणार का ?
मागील काही वर्षांपासून सुरू असलेला हा कोट्यावधीचा गोरखधंदा काही कर्मचाऱ्यांच्‍या संगणमताने अर्थपूर्ण देवाण-घेवाण करून राजरोसपणे सुरू असल्‍याचे दिसत आहे. त्‍यामुळे संबंधित प्रशासनाचे वरिष्‍ठ अधिकारी प्रत्‍यक्ष स्‍थळ पाहणी करणार का ? तसेच प्रकरणाची सखोल चौकशी करून कारवाई करणार की प्रकरणावर पांघरून घालणार हेच पाहणे महत्‍वाचे ठरणार आहे.
