एल्‍गार न्‍यूज (परवेज पठाण) :-
निवडणूक आयोगाने नुकतंच नगरपालिकांच्‍या दृष्‍टीने तारखा जाहीर केल्‍या आहेत, सर्वात आधी नगरपालिकांच्‍या निवडणुका होणार आहेत, त्‍यानंतर म्‍हणजेच पुढील महिन्‍यात जिल्‍हा परिषद, पंचायत समित्‍यांची निवडणूक होणार असल्‍याचे दिसत आहे. त्‍यामुळेच ग्रामीण भागात आता जिल्‍हा परिषद किंवा पंचायत समिती सदस्‍य पदाकरिता निवडणूक लढवण्‍यासाठी इच्‍छुकांची नावे समोर येत आहेत.
संदिप (बबलू) कंटुले
शिवसेना (उबाठा) घनसावंगी तालुकाप्रमुख असलेले संदिप (बबलू) कंटुले हे त्‍यांच्‍या पत्‍नी सौ.मनिषा संदिप कंटुले यांना कुंभार पिंपळगांव जिल्‍हा परिषद गटातून निवडणूक लढवण्‍यास इच्‍छुक आहेत. संदिप कंटुले यांच्‍या आई सध्‍या कुंभार पिंपळगांव ग्रामपंचायतच्‍या उपसरपंच असून पत्‍नी सदस्‍य आहेत. संदिप कंटुले हे मागील अनेक वर्षे शिवसेनेत कार्यरत असून जिल्‍हा परिषद गटासह तालुक्‍यात त्‍यांचा चांगला जनसंपर्क आहे. संदिप कंटुले सामाजिक कार्यात नेहमी अग्रभागी असतात, शिवाय त्‍यांचे पक्षाच्‍या वरिष्‍ठ नेत्‍यांशी चांगले संबंध असल्‍याने त्‍यांचा प्राधान्‍याने विचार होण्‍याची शक्‍यता आहे. जर आघाडी झाली तरी त्‍यांच्‍या नावाचा प्राधान्‍याने विचार होवू शकतो. पक्षाने त्‍यांच्‍या पत्‍नी सौ.मनिषा संदिप कंटुले यांना तिकीट दिल्‍यास ते पूर्ण ताकदीने निवडणूक लढवणार असे सध्‍याचे चित्र आहे.
सुशिल तौर
राष्‍ट्रवादी कॉंग्रेस पक्ष (शरदचंद्र पवार) चे सक्रीय कार्यकर्ते तथा लिंबीचे माजी सरपंच सुशिल तौर हे त्‍यांच्‍या पत्‍नी सौ.पौर्णिमा सुशिल तौर यांना पक्षाने संधी दिल्‍यास राजाटाकळी जिल्‍हा परिषद गट किंवा गुंज पंचायत समिती गणातून निवडणूक लढवण्‍यास इच्‍छूक आहेत. सौ.पौर्णिमा सुशिल तौर ह्या सध्‍या लिंबीच्‍या सरपंच आहेत. सुशिल तौर हे सरपंच परिषद (पुणे) चे प्रदेश सहसचिव असून राष्‍ट्रवादी कॉंग्रेस सरपंच संघटनेचे घनसावंगी तालुकाध्‍यक्ष सुध्‍दा आहेत. त्‍यांचा जिल्‍हा परिषद गट व पंचायत समिती गणासह तालुक्‍यात चांगला जनसंपर्क आहे. सरपंच व इतर पदांच्‍या माध्‍यमातून केलेले कार्य, सामाजिक कार्यातील सहभाग तसेच माजी मंत्री राजेश टोपे यांचे निष्‍ठावंत कार्यकर्ते असल्‍याने त्‍यांचा प्राधान्‍याने विचार होवू शकतो. पक्षाने सौ.पौर्णिमा सुशिल तौर यांना संधी दिल्‍यास सुशिल तौर हे पूर्ण ताकदीने निवडणुकीच्‍या रणसंग्रामात उतरू शकतात असे सध्‍याचे चित्र आहे.
अनिरूध्‍द शिंदे
एकनाथ शिंदे यांच्‍या शिवसेनेचे पदाधिकारी असलेले अनिरूद्ध शिंदे हे मागील पंचवार्षिक मध्‍ये पंचायत समिती सदस्‍य तथा शिवसेना गटनेता या पदावर कार्यरत होते. तसेच अनिरूध्‍द शिंदे यांच्‍या मातोश्री देवी दहेगांवच्‍या सरपंच आहेत. पक्ष तसेच डॉ.हिकमत उढाण यांनी आदेश दिल्‍यास ते निवडणूक लढवू शकतात. अनिरूध्‍द शिंदे हे नेहमी पक्ष कार्यासह सामाजिक कार्यात सहभागी असतात. राजकीय कारकिर्दीच्‍या सुरूवातीपासून ते शिवसेनेत सक्रीय असून घनसावंगी मतदारसंघाचे आमदार डॉ.हिकमत उढाण यांचे ते समर्थक आहेत. त्‍यांचा घनसावंगी तालुक्‍यात चांगला जनसंपर्क असल्‍याने पक्ष त्‍यांचा प्राधान्‍याने विचार करेल असे सांगितले जात आहे. पक्षासह डॉ.हिकमत उढाण यांनी आदेश दिल्‍यास ते निवडणुक लढवू शकतात असे सध्‍याचे चित्र आहे.
वरिष्‍ठ नेत्‍यांकडे लक्ष !
एकूणच घनसावंगी मतदारसंघात विविध पक्षातून पक्ष कार्यकर्ते व पदाधिकारी जिल्‍हा परिषद गट व पंचायत समिती गणातून निवडणूक लढवण्‍यास इच्‍छुक असून अनेक वर्षे निवडणूक न झाल्‍याने यंदाच्‍या निवडणूक रणसंग्रामात अनेक अटीतटीच्‍या लढती पहायला मिळणार हे निश्चित आहे. जिल्‍हा परिषद व पंचायत समिती निवडणुकीसाठी कालावधी कमी राहिलेला असल्‍याने तारखा जाहीर होताच पक्षाने अथवा संबंधित पक्षाच्‍या वरिष्‍ठ नेत्‍यांनी लवकरात लवकर तिकीट फायनल करणे महत्‍वाचे ठरणार आहे.