एल्‍गार न्‍यूज (परवेज पठाण) :-
आगामी काळात होणाऱ्या जिल्हा परिषद, पंचायत समिती आणि नगर परिषद निवडणुकांसाठी सर्वच पक्ष आणि स्थानिक नेत्यांनी कंबर कसली आहे. निवडणुकीच्या तारखा जाहीर होण्याची अधिकृत घोषणा अजून व्हायची असली तरी जिल्ह्याच्या ग्रामीण आणि शहरी भागात राजकीय तापमान चांगलेच वाढले आहे. निवडणूकांच्‍या तारखा अजून जाहीर झाल्‍या नसल्‍या तरी आपल्‍यालाच तिकीट मिळेल या भावनेतून इच्छुक उमेदवार मतदारांच्या भेटीगाठी घेत असून लक्ष राहू द्या असं म्‍हणू लागले आहेत.
कुंभार पिंपळगांव गट व गण !
घनसावंगी तालुक्‍यातील कुंभार पिंपळगांव हे जिल्हा परिषद गट असून कुंभार पिंपळगांव व जांबसमर्थ हे २ पंचायत समिती गण आहेत. प्राप्‍त माहितीनुसार जि.प.गटासाठी सर्वसाधारण स्‍त्रीला जागा आरक्षीत झाली आहे, तर कुंभार पिंपळगांव पंचायत समिती गण नागरिकांचा मागास प्रवर्ग स्‍त्री साठी जागा आरक्षीत झाली आहे, तसेच जांबसमर्थ पंचायत समिती गणासाठी सर्वसाधारण स्‍त्रीसाठी जागा आरक्षीत झाली आहे.
राजाटाकळी /आंतरवाली गट व गण !
घनसावंगी तालुक्‍यातील राजाटाकळी हे जिल्हा परिषद गट सर्वसाधारण स्‍त्रीसाठी तर आंतरवाली टेंभी हे जि.प.गट सुध्‍दा सर्वसाधारण स्‍त्रीसाठी आरक्षीत झाले आहे. तसेच राजाटाकळी पंचायत समिती गण हे सर्वसाधारण असून गुंज बु. हे गण सर्वसाधारण स्‍त्रीसाठी आरक्षीत आहे. तर आंतरवाली टेंभी पंचायत समिती गण अनुसूचित जाती स्‍त्री साठी आरक्षित झाले असून पिंपरखेड बु. हे गण नागरिकांचा मागास प्रवर्गासाठी आरक्षीत झाले आहे.
इच्छुक उमेदवारांची धावपळ
आपापल्‍या जि.प. गट व पंचायत समिती गणात संभाव्य उमेदवार / प्रतिनिधी चालता फिरता मतदारांच्या दारी पोहोचत आहेत. येत्‍या निवडणूकीत आम्‍हाला आशीर्वाद द्या असा संदेश देत ते लोकांशी संवाद साधत आहेत. या निवडणुकीत पारंपरिक पद्धतीसोबतच डिजिटल माध्यमांचा सुध्‍दा मोठ्या प्रमाणावर वापर होत आहे. सोशल मीडियाच्‍या माध्यमातून उमेदवार आपली ओळख आणि आपली बाजू जनतेपर्यंत पोहोचवण्‍याचा प्रयत्‍न करीत आहेत.
मतदारांच्या अपेक्षा वाढल्या
या वेळी मतदारांच्या अपेक्षा मोठ्या प्रमाणात वाढल्या आहेत. एक तर मागील बराच काळ निवडणुका न झाल्‍याने विकासकामे ठप्‍प झाल्‍याचे चित्र आहे. त्‍यामुळे मतदार आता अधिक सजग झाले आहेत. शिक्षण, रस्ते, पाणीपुरवठा, आरोग्यसेवा, रोजगार, स्थानिक विविध प्रश्न आदी विकासाच्या मुद्द्यांवरच मतदारांचे लक्ष केंद्रीत करणार असल्‍याचे दिसत आहे. अनेक मतदार थेट विचारणा करत आहेत की, “आमच्या गाव परिसरातील मूलभूत प्रश्न सोडविण्यासाठी तुमची योजना काय आहे ?” अर्थात याचे उत्‍तर प्रत्‍येक जण आपापल्‍या परीने देण्‍याचा प्रयत्‍न करीत आहे.
विविध मुद्दे केंद्रस्‍थानी
अनेक जि.प.गट आणि पंचायत समिती गण हे महिलांसाठी राखीव झाले आहेत. त्‍यामुळे अर्थातच विकासाच्या मुद्यांसह महिला सक्षमीकरणाचा मुद्दा सुध्‍दा प्रचारात दिसून येणार आहे. या निवडणुकांमध्ये योजना आणि विकासाचे मुद्दे केंद्रस्‍थानी असणारच आहेत, परंतू त्‍यासोबतच सामाजिक सलोखा, तरुणांच्या रोजगाराच्या संधी आणि महिला सक्षमीकरण हेही मुद्दे पुढे येत आहेत.
तिकीटासाठी प्रयत्‍न
निवडणुकांच्‍या तारखांची घोषणा कधीही होवू शकते, कारण सुप्रीम कोर्टाच्‍या आदेशाचे पालन सांगितलेल्‍या वेळेत करणे क्रमप्राप्‍त झाले आहे. त्‍यामुळे संबंधित जिल्हा परिषद गट व गणासाठी इच्छुक असलेले उमेदवार आपापल्‍या परीने पक्षाकडे तिकीटासाठी प्रयत्‍नशील असल्‍याचे दिसत आहे. अर्थातच फिल्‍डींग लावणे सुरू आहे. येत्‍या निवडणुकीत स्थानिक स्‍वराज्‍य संस्‍थांच्‍या निवडणुकीत युती किंवा आघाडी करून निवडणुका होतात की सर्वपक्ष आपापले स्‍वतंत्र उमेदवार मैदानात उतरवतात हेच पाहणे महत्‍वाचे ठरणार आहे.
इच्छुक उमेदवारांची माहिती लवकरच !
विविध पक्ष स्थानिक स्‍वराज्‍य संस्‍थांच्‍या निवडणुका जालना जिल्‍ह्यात स्‍वतंत्रपणे लढवतात की युती / आघाडी करून लढवतात यावर बरंच काही अवलंबून आहे. सध्‍या काही जणांची नावे समोर आली आहेत तर काही नावे पडद्यामागे आहेत. लवकरच कुंभार पिंपळगांव, राजाटाकळी व आंतरवाली टेंभी जि.प.गट आणि त्‍या अंतर्गत येणाऱ्या पंचायत समिती गणातून कोण कोण इच्छुक आहेत यासह पुढील अपडेट एल्‍गार न्‍यूज मध्‍ये प्रकाशित करण्‍याचा प्रयत्‍न आहे. तोपर्यंत Wait & Watch….
खालील यूट्यूब व्हिडीओ पहा…
